"همدان"دا، "سينا" چيخير، "قارچيچه يي"

"همدان"دا، "سينا" چيخير، "قارچيچه يي"!-آيدين اوجانلي

تبريز بيليم يوردو
علوم تربيتي فاكولته سي

هردن گئجه، فيكره داليب، سئير ائديره م شهيرلري، كندلري
اؤز ايچيمده، دپرديرم، داغا دؤنموش يارالاري ـ دردلري
نيسگيللريم باغريم ايچره سيندير: سينيرلاري، حدلري
خيال قوشو قانات وئرير قاناتلانام، اوچام من!
اوزاق دوشن شهريمه قونام من!
هارايلاري بوغازيمدا بوغام من!
سوكوت ايله قهيرلري دويام من!

هردن گئجه آي چيخاندا،
قارانليغين آغير يوكو آرخالاري بوخاندا،
قارا يئلين اسينمه سي ائوجيكلري ييخاندا،
" همدان "ين گوندوزونو يادا ساليب، گئجه سيني دوشونوره م
اؤز ايچيمده اوشونوره م، بوزونوره م، بير آز گئري سورونوره م
اوز قويورام كئچيدلرين بيريسينه
گؤز تيكيره م ائوجيكلرين خيرداسينا ـ ايريسينه !
اوردا ياتان اينسانلاري آراييرام
كيم نه بيلير؟ بلكه ده من غم توزونو اوره ييمه قالاييرام
سونرا دؤنوب يالاييرام

بير ائوجيكده بيري ياتميش گؤرونور :
اپره ك دؤشك، ايچه رسي ياش! ياسديغي داش! آغير يورقان اوستو توزاق!
اوردا ياتيب تيكيك دوداق!
الي باغلي! ايتگين ائلي!
بئلي بوكوك! ديلي كسيك!
نيسگيل دولو قوجاغيندا، كؤز قالماييب اوجاغيندا
قيشدا اسن سازاق يئلي، بورقان وئرير اوچقون ائوين بوجاغيندا
آمان وئرمير قيش گونونون ظاليم يئلي، دورماز اسير قوجاغيندا
گولدان گولو ساراليبدير آتوشگه نين قيراغيندا
تور آتانلار، تور توخويوب، باخينجاسين قارالديبلار
ايشيق گؤرمز ائوجييينده، چيچك بيتمز كرديسينده
آراييرام "نَده ن"لري، دووارلاردا، باجالاردا
هپ گئجه نين بو چاغيندا، بؤيله ياتميش اينسانلاري آراييرام
هردن اونون اينيلتيسي، سيزيلتيسي، اؤفكه لرين آيدينلادير
بلكي جانين هاراييندا
بلكي اؤلمك حاليندادير
بو سيزيلتي جلاد الده بير قامچي تك، باشا چالير
سانكي منيم كؤكسوم يانير
سوره كله نن سيزيلتيدان بئزيكيبن سوروشورام:
ياتان قارداش!
نده ن بؤيله سيزيلديرسان؟
بو نه حالدير؟ بو نه دوروم؟ آتان اؤلموش؟ آنان اؤلموش؟
يوخسا باختين ياتيبدير مي؟ يا كيمسه لر آتيبدير مي؟
دوداقلارين تيكيب كيمسه؟
بير آن ديله گليب منه بؤيله دئيير:
" يوخ!
كئشكه باختيم ياتايدي، يا كيمسه لر مني دانيب آتايدي !
بو اؤزومه م؛ اؤزلويومو آتان من! لاي ـ لايلارا اويوب ياتان من!
من اؤزومو ايتيرميشم، و اؤزومو تانيمادان، يابانجيلار پالتار تيكيب ائينيمه !
قالماميشام اؤز ائليمين هئيچ قئيدينه !
يازيق اولسون! ايتيرميشم دوز يولومو!
كيمليييمي، گئچميشيمي، بو گونومو!
اوز ائليمدن اوزاقلانميش، اؤز ديليمي دويماميشام
توپراق مندن اوز دؤنده ريب، منليك سيز ايچره يانميشام
اؤز ايچيمده قالانميشام، تالانميشام
يوخ! بلكه ده من يانماق ايچين يارانميشام؟!"
بو يانيتدان سيلكه له نيب، ديسكينيره م
اوشونوره م، اوشوندوكده يورقانيمين قاتيسيندا قيسيليرام
آما نه دن ايسينميره م !
قاچينيرام بو دورومدان، اوتانيرام بو سورغومدان! بو يانيتدان!
اويخو گيرمير گؤزلريمه، گئجه كؤچمور، دان سؤكولمور
قولاق وئره ن يوخدور منيم سؤزلريمه
بير اؤزومه م ـ بير ده اؤزوم، آنجاق هله تورانليقا واردير گؤزوم

قارانليقلار سونا چاتير، گؤيده گؤزه ل گونش ساچير
گوج گليري ديزلريمه، آدرس وئرير ايزلريمه
اوغورلار اؤرپك، لئچه يي
"همدان"دا، "سـينـا " چيخير
"قار چيچه يي" !

آنجاق منه بؤيله گلير:
بايرام آيي قار چؤكمه ميش، داش ديبينده ن، او سئرت قاري قاوزاياراق
باش قالديرير "قار چيچه يي"
موشتولوغون يئره سَپير ياشيليغين
سونرا دئيير:
" نوروز گولو! يارپيز گولو! آييق اولون داها يازدير
گئتمه ليدير قيشين ايزي، آخي اونون عؤمرو آزدير "

نوروز گولو، يارپيز ايله پيچيلداشير
ياشاييشا ماراقلاري آشيرداشير
سَس قاوزانير
هامي گوللر بير ـ بير ايله هارايلاشير، "قارچيچك" له يانيتلاشير
ياشيلليقلا سالاملاشير
ياشام ايله سالاملاشير
----------------------------------------

آيـدين اوجانلي" نين مكتـوبونا جاواب
سـن يئتمدين، سـالديم يئـره قـالخـاني

سؤيله ين: غلامرضا بهاری (باهارلی) همدان اوستانينين بهار (باهار) شهريندن

"آيـدين اوجانلي" نين مكتـوبون آچـديم
سـپـه لندي دوشـونجـه مه دويـغـولار
اوخـودوقـجـا اينجه خيـال شئـعـرينـي
گئجـه م خيـاليـندان كؤچدو اويـخولار
×××
مـادلار ائـلي دؤولـت قـوران مـاحـالدا
"آيـدين" منـه قـوناق اولـوب خـيالـدا
گــؤردو منـيـم ائـوجييـيـمي زاوالـدا
سـوردو منيـم كيـمليييمدن سـورغـولار
×××
سـوردو منـدن نـه لـر گلـيب بـاشيـنـا
بـاش قـويوبسان ائـوجيـييـنـين داشـينا
دالـدي گـؤنـلوم آيـدينين گـؤز يـاشينا
دوشـدو خـيـال ايـپـلريـنه بـورغــولار
×××
آيـدين! گئـچـرديـييم گـونلـره ايـنـان!
سـان منـي گئـچنده "قـاراچـوق چوبان"
اؤلـكه م يـاغمـالاندي٬ گـلمه دي "قـازان"
باشيـمدان داغيـلدي قيـزيـل تـوخـلولار
×××
مـن اويـام كي قالميش تاريـخده ايزيم
دوشـمانين كـؤكسونده پـولاددير ديـزيم
"بـاهارلو" ائـلىيم، قـانلىديـر سـؤزوم
كؤچـموش بيـزيم يوردوموزدان قورخولار
×××
آي "آيدين"يم خار ائتميشديم دوشماني
سـن يئتمه دين، سـالديم يئـره قـالخـاني
اولـدو ائـويم كيـمليـييـمين زيـنـداني
اكـدي خـنجـر اوره ييــمـه قـايـغـيـلار
×××
گئـچدي زامــان٬ ائللـريـميـز آيـيـلدي
ديللـريـميز بيـرـ بيـريـنه بــاييـلـدي
بيـرليـك سـسي اؤلـكه لـره يـايـيلدي
اينـدي گئـديـر بــاور اولا آرزيــلار
×××
اينـدي تيـكيلميش دوداغيـم دَپره شير
ائللـره آرخـايين اولـوب گپـله شيـر
بيـر گـون اولـور شنـليييميز دبله شير
"تپـه گـؤز"لر آراميـزدان محـو اولار
×××
گـونش اويـور قيش سازاغين بينادان
قـورتولاجاق داغ باشـي فيـرتيـنادان
قـار چيچه يي باش قالديريب "سينا"دان
گـؤندريري سيـزه سـلام ـ سايـقـيلار
×××
"سيـنا" بيـزيم اؤلـكه ميزين ديلىدير
"سيـنا" بـوتون آذربـايجـان ائـلىدير
"سيـنا" بـوگـون باخچالارين گولودور
"سـينا" دييـور: بيتدي داها بيز ـ اولار
×××
"باهـارلي"يـام، دارغيـنمارام دارليــغا
اؤيـونـه رم ائـللـريـمـلـه وارليـغـا
"آيـدين"ا من سؤز وئريره م يارليغا
بير شئييم يوخ٬ هر شئييمدير دويغولار