بلالي زامان

هادي فيروزي

بهار ( باهار ) شهريندن- همدان اوستاني - آزربايجان

(« سينا » هفته لييينين 117- نجي ساييسيندا چاپ اولموش )

فلكين چرخينه لعنت ، كي جفاسي چوْخ اولوب
پيس ائديب ياخچيلاري، دام-ي بلاسي چوْخ اولوب

ياخچيليقدان داها ايندي بُو زامانلار سؤزو وار
كؤلگه سينده دوْلانير ناكيشيلر چوْخ موزو وار

گئدي ـ گَللر آزاليب ، يوْخدو صفا ائولرده
يوُرد ساليب بوُردا شياطين بالاسي، دئولرده

هر كيمين فيكري بوُ دور بؤرك قوْيا يوْلداش باشينا
گون چيخاندان باتانه ، نقشه چَكَه قارداشينا

نَه قييامت تانييوْرلار ، نَه جهننم نَه موعاد
كسب-ي كار-ي اوْلانين گؤر نَه اوْلوب رِيزقي كَساد

بيري دؤرت دفعه گئديب مككه يَه آمما چوْخو دا
گئجه لر شابديلعظيمه (1) گئده بيلمه ز يوْخودا

مككه دن تا يئتيشه ر يئددي سَفَر، سوفره سالار
وارليدير هامي قوْناقلار ، فوْقَرا دالدا قالار

جور به جور ماشينه باخ پارك ائله ييبدير ائوينه
يوز تومن وئرسه كيمه ، اللي چَكَه ر تنزيلينه

آديميز شيعه دي آمما يوْلوموز ضيدد-ي "علي" (ع )
هر بلا گَلسَه بيزيم باشيميزا يوْخدو ولي

علي'نين شيعه سي اؤز دينيني ساتماز قيرانا (2)
اوْخوسا هم عمل ائيله ر خودا يازميش قورآنا

علي'نين شيعه سي ميسكينه باخا ، قلبي يانار
حل ائده ر مؤشگولونو قلبيني غمدن قوُتارار (3) ...

1- شابديلعظيم: شاه عبدالعظيم حسني (ع) 2- قيران: اَسكي و قديم پول واحيدي 3- قوُتارماق : خلاص ائله‏ مك ، نجات وئرمك