استاد غلامرضا بهاري' نين « قوجا باهار » باشليقلي منظومه سيندن بير نئچه بند :
قوجا باهار !
"باهار"يم شانلي ديياريم ، "همدان`ين" ببه يي
چيرپينير سنده هله شانلي عاريفلر اوره يي
اَته يين گوللرينه قيسقانار "الوند" اته يي
اَته يين گوللري عاريفلريميز مقبريدير
گولشنين گوللرينين ده شوهدا پرپريدير
"باهار" يم آي كيشيلر يوردو محببت قوجاغي
سؤنمه ييب سنده هله قورخماز اره نلر چيراغي
دِئ گؤروم هاردا يانارميش ائليمين ايلك اوجاغي
گئديم او اؤلكه ده كي داغلارا تعظيم ائله ييم
بير قوجاق گول گتيريب شهريمه تقديم ائله ييم
"باهار"يم كيم او زامانلار اوبا سالديردي سني ؟
كيم آدين قويدو زامان عرشينه قالديردي سني ؟
كيميدي سِيككه كيمي اؤلكه ده چالديردي سني ؟
كيم سنه قازدي كريز ، بسله دي گول باخچالاري ؟
سولارين آخدي ، بوتون تاريخه يازدي "باهار"ي
باغ-و بوستانيوه داييم آچيب "الوند" قوجاق
باش اه ييب شأنيوه هئيبتله دوروب "آلما قولاق"
باش قويوب باغلاريوين كؤلگه سينه " چوخلي بولاق"
هر سحر ، دان زاماني ، اولدوز اَنه ر چؤللريوه
گون ساچار لعل-ي زومّوررود سَپَه لر گوللريوه
" قوجه باهار " قوجاغيندان پَر آچيب اوچمالييام
يوكسه ليب آيري اوفوقلاردا قاناد آچمالييام
بير گونش تك زامانين هر يئرينه ساچمالييام
گونش اولسام دا منيم شانلي چيخاريم سن اؤزون
باتار اولسام دا گئنه غملي باتاريم سن اؤزون
تا مؤذذين وئره ر آفاقه صلاتيله صلا
" بهاري " گونبدينه جيلوه وئره ر پرچمِ-ي لا
گون ساچار مقبره سيندن وئريله ر شهره جلا
سانكي بو منظره بير جيلوه لي جننت باغيدير
اوز قويين مقبرينه ايندي زييارت چاغيدير
تا "علي" در گهينين اولدو جوارينده موقيم
اولدو دريا-يي كراماتده بير دُورر-ي يتيم
وئردي عيرفاندا " شوندي " لقبين : " شئيخِ-ي حكيم "
سؤيله دي حؤوزه ده اصحابه حكيمدير "بهاري"
چونكو حيكمتله هر اينسانه نديمدير "بهاري"
"اصغري"لر گؤيونون اولدوزي پارلاقدي هله
"سئييد ايبراهيم" فرخونده سيير ، ساغدي هله
عورفا اؤلكه سينه چئشمه لي بير داغدي هله
"سئييد ايسماعيل" اونون خلقه دوشه ن كؤلگه سيدير
كؤلگه نين اوجي ـ بوجاغي همدان بؤلگه سيدير
"اصغري" لر اوجاغي : آيتِ-ي حق "سيد شكور"
او آچيق بارگهيندن سَپه ر اطرافينه نور
گَل بو درگاهه گتير درديوي ، قلبينده حوضور
بيل كي بو مقبره دن درد لره درمان يازيلار
بو اوجاق ايچره ، كَده رلر اوره ييندن قازيلار
" ريضا باهارلي " ، " تئليم خان " كيمي بير شاعير ايميش
شئعرده سانكي ازلدن ابده ناظير ايميش
يئر-ي گؤيدن سؤز آچاندا قلمي فاخير ايميش
سينه لرده ييغيليب غوصصه كيمين قالدي سؤزي
شئعرينين دردلي اوره گلرده هله واردي ايزي
" زكي " نين قوشمالاري ، ظولميله داييم دؤيونه ر
" زكي باهارلي " ، " ريضا " نين لقبيندن اؤيونه ر
شهريمين كيملييي بو ايككي شاعيردن سؤوونه ر
توركي لر باخچاسينين شانلي " زكي " بير گولودير
" ريضا " گول باخچالارين هم گولو هم بولبولودير
طالئعيم يازدي ازلدن كؤله ، نامرده مني
درد-و غم لشگرينه ائيله دي سركرده مني
بير عوقابم كي ساليب قحبه فلك درده مني
طبعيمين قارتالينا اوچماغا گؤگلر دار اولوب
قارقالاردان چكينه ركن ديديييم قار ـ قار اولوب
بيري دونيايه گونش تك گليب آفاقه ساچار
بيري دونياني اوتوب آجدي گئنه آغزين آچار
بيري آسلان كيمي داردا ، بيري دار گوندا قاچار
دونيانين موشگول آچان ، ايش آشيران مردي ده وار
ايش باشيندا گؤزو ـ دار حككه لي نامردي ده وار
تورك`ه م ، اؤز تؤركلويومون آدينا قلبيم دؤيونه ر
چنلي " الوند " چاتيب عرشه بو ديلدن اؤيونه ر
" همدان " بؤلگه سي ، تورك عنعنه سيندن سؤوونه ر
" همدان " بؤلگه سينين كولتورو اَن تورك اوجاغي
خلقينين اؤلكه ده هر توركه آچيقدير قوجاغي .....
0 Comments:
Post a Comment
<< Home