همدانˊي تاريخ آزربايجانˊا وئريب، من وئرميره م".

همدانˊي تاريخ آزربايجانˊا وئريب، من وئرميره م".

آشاغيداكي يازي، صابير روستمخانليˊنين اوزون بير يازيسيندان قيسسا بير آلينتيدير.

مئهران باهارلي

"قاييديرام آراز بويو-٢"دن بير آلينتي- صابير روستمخانلي
آزر درگيسي، سايي ايكي، اوكتوبر-نووامبر- ١٩٩٠
".....

اوتايˊا باخيرام و بو عصرده ايران حاكيمييت اورقانلارينين جنوبي آزربايجان [تورك] خالقينين باشينا آچديغي اويونلارين آجي، تحقيرآميز و دهشتلي صحنه لري گٶزوم اٶنونده جانلانير.

بو زوراكيليق اوولجه اراضيدن باشلانميشدي. ايرانˊا قاتيلاندان سونرا اٶلكه نين دٶرد ايالتيندن بيريني تشكيل ائده ن آزربايجان ايالتي (ايندي آزربايجان اٶزو دٶرد ايالته بٶلونوب. ص. ر.) اراضيسينه ايلك دٶورلرده جنوبدا همدان، جنوب شرقده زنجان و قزوين ماحاللاري دا داخيل ايدي. (باخ: جنوبي آزربايجان تاريخينين اوچئركي. عئلم نشريياتي، باكي، ١٩٨٥، ص ٨). لاكين سونرالار ايران سياستبازلاري ماحال و ويلايتلرين سايي[سي]ني، سرحدلرين تئز تئز و اٶز ايسته كلري كيمي ده ييشديرميشلر. هر دفعه ده اساس مقصد، تاريخي آزربايجان توپراقلاريني كسيب دوغراماق، حلال يئرلريميزي، قديم شهه رلريميزي اليميزدن آلماق اولموشدور.

حاشييه: بو يازيمين بير حيصصه سي "آزربايجان" ژورناليندا چيخاندان سونرا چوخ حٶرمت ائتديييم تاريخچي "عاليم"يميزله راستلاشديق. غريبه اينجيك بير ادا ايله (سانكي من اونا آغير بير سٶز دئميشه م) "سن نه ائديرسه ن؟" دئدي، "بيرجه بو قالميشدي، همدانˊي دا آزربايجان شهه ري ساييرسان؟!" دوغروسو بو سٶزو تاريخچي ديليندن ائشيتمك گٶزله نيلمه ز ايدي. گوله گوله: "من كيمه م كي يئر پايلايام؟" دئديم. "او، سيزين كيمي بٶيوكلرين ايشيدير. همدانˊي تاريخ آزربايجانˊا وئريب، من وئرميره م". دئييب آرالانديم. بو گٶزله نيلمه ز حيكايه نين، هوجومون تاثيرييله فيكيرله شيرديم كي بيز هله ساده لٶوحليكله بئله عاليملردن اوموروق كي آزربايجان تاريخيني يازسينلار. اونلارين يازديغي تاريخ نه اولاجاق؟
........

١٩٣٧ جي ايلده ايران اون اوستانا بٶلونه نده آزربايجان اراضيسينين اساس حيصصه سي "شرقي آزربايجان" و "غربي آزربايجان" اوستانلارينا وئريلدي. (ايرانˊين اوچونجو و دٶردونجو اوستانلاري). اهاليسي بوتٶولوكله آزربايجانلي [تورك] اولان زنجان و همدان ماحاللاري ايسه آيريجا قوبئرناتورلوغا، سونرا دا اوستانلارا چئوريلدي. ريضاشاهˊين ايكي يئره آييرديغي جنوبي آزربايجانˊي، اوغلو محممدريضاشاه دٶرد يئره پارچالادي. آزربايجانليلار [توركلر] ياشايان بعضي باشقا ماحاللار دا اهاليسي قاريشيق اولان اوستانلارا قاريشديريلب "اريديلدي". حياسيزليق او يئره چاتدي كي ١٩٥٤ جو ايلده آستارا دا اٶز اطرافييله بيرليكده شرق آزربايجانˊدان آلينيب گيلانˊا قاتيلدي. [گونوموزده گونئي آزربايجان توپراقلاري اون ايكي-١٢ اوستان آراسيندا بٶلوشدورولموش دورومدادير. مئهران باهارلي]

حاشييه: بير دفعه تبريزˊين فوتبول كومانداسي (تيمي) تئهران كومانداسي ايله اويناييب و ٣-١ حئسابي ايله غاليب گلير. آزربايجانلي [تورك] آغ ساققاللاردان بيري كوماندانين باشيچيسينا حيرصله نيب كي "نييه اودورسوز بونلاري؟ قورخمورسونوز شاه حيرصله نيب آزربايجانˊي بير ده تزه دن بٶلوب پارچالايار؟"

بلي، ايران حاكيملرينين بٶيوك بير خالقا موناسيبتي بئله دير. آخشام تيكه سي بوغازيندان دوز گئتمه دييسه، سحر تئزدن گٶسته ريش وئرير كي فيلان يئر آزربايجانˊدان آلينيب باشقا اوستانا قاتيشديريلسين.

نئچه مين ايلدير كي بئله جه بابالاريميزين قانييله سوواريلميش ان بٶيوك دٶولتلريني قورموسان! ايندي همين توپراقلار نئچه نئچه اوستانا، ايالته، قوبئرناتورلوغا بٶلونور. سنين بابا يوردونا كيملر گٶز تيكمه دي؟ بوتون شرق تاريخي ورقه له نسه بيزيم قده ر ازيلميش، بيزيم قده ر تحقير اولونموش، بيزيم قده ر پارچا-تيكه بٶلونموش و بيزيم قده ر ده بو قارا طالئعي ايله باريشماغا وادار ائديليب سوسدورولموش ايكينجي بير خالق تاپماق چتيندير. هله جنوبي آزربايجان بير يانا! بيز مگه ر قديم پايتخت شهه رلريميزدن دربندˊين تاريخيني كيفايت قده ر آراشديرابيلميشيك مي؟ مگه ر بورچالي چٶكه يينده كي ائللريميزين تاريخي، ائتنوقرافيياسي، فولكلورو، اوناماستيكاسي كيفايت قده ر اٶيره نيليب مي؟
........ "